1Th 1 | NAS | STEP | Tee ning Paulaꞌ. Sailas naankai Timoti pakumuresitaaꞌ daarirerompimang diiꞌ Niuma Kumponing eeꞌnoko Ovoring Jiisuuꞌ Karistooꞌ beekaning dootuuꞌnupoong Tesalonaikaꞌke otorimaing. Biraanke eeꞌnoko mooa diiꞌkoo otoaing.

1 Thessalonians 1

Paulaꞌ Norunoruꞌarakoꞌnaꞌ Tesalonaikaꞌnupoong-koo

(1:1–3:13)

1 Tee ning Paulaꞌ. Sailas naankai Timoti pakumuresitaaꞌ daarirerompimang diiꞌ Niuma Kumponing eeꞌnoko Ovoring Jiisuuꞌ Karistooꞌ beekaning dootuuꞌnupoong Tesalonaikaꞌke otorimaing. Biraanke eeꞌnoko mooa diiꞌkoo otoaing.

Paulaꞌ Dotuaruꞌnaꞌ Tampaꞌ Kumponing Masikaꞌantavauꞌnung-koo

2 Kumponing tampara tampampimaung doong kante diiꞌkoo ookara-koo eeꞌnoko tantarampimaunge diiꞌ niikaang kunsi-koo ookara-koo. 3 Tenang kunsimarima niikaang Kumponing-koo, tee Niuma-koo, niiꞌ ampaꞌmoriaung aaꞌnong: Kumponing masikaꞌantanaꞌ otoriiꞌnaang poreꞌ komperimaung-koo, nantoong piaaverereriiꞌnaang tuꞌdorimaung-koo, eeꞌnoko niikaang Ovoring Jiisuuꞌ Karistooꞌ toroaravainaꞌmung bateinang-koo doong kante aaꞌnaꞌ noruꞌerimaung-koo. 4 Niiꞌmaikororiꞌ Kumponinge piaarurimaing, niiꞌke noruꞌampiri otong Kumponinge diiꞌ miruꞌduruꞌ bakaning deentariiꞌnaang. 5 Aming-koo teeꞌ noruꞌampiri otong? Nnaꞌ tee doorenang tampara tampaꞌ tavoꞌarioꞌ ooampira diiꞌkoo. Tee minkunaa diiꞌkoo tavoꞌampiruꞌnung tamunsiꞌnung deeaꞌ, Tanuaang Meekung bakaang purintoꞌ ninka tavoꞌaruꞌ. Teie tee minkunaa masikung iriꞌoi tasiꞌantaruruꞌ. Eeꞌnoko tee diiꞌke tasiꞌperi niikaang aarumo tampara, napoꞌ tee minkunaa masikung tasiꞌperuꞌ. 6 Teeꞌkoo diiꞌ niiꞌkoo biꞌantarariri siomperimang tee Ovoring, aaꞌnong bane poreꞌanta kuneꞌerima niikaang minkunaa taaraveruꞌ Tanuaang Meekunge doturotu-antaruriko. 7 Diiꞌ aaꞌ enang tee aaꞌnaꞌ masikaꞌantaverimaung-koo nantoonge siontaariaining deentaririning ookavoraꞌka-kooninge masikaꞌantavarimainge, aaꞌninge diikanooꞌ Masedoniaꞌnupoonge eeꞌnoko Akaiaꞌnupoonge napoꞌ. 8 Eeꞌnoko baruꞌ Masedoniaꞌ naanka Akaiaꞌkooning nainge taaravaavaꞌ tee Ovoring bakaang kara diiꞌketa, teka tee diiꞌke Kumponing masikaꞌantaverimanaꞌ doonaanka-koo beremparing-koo niiꞌ kara oꞌnoriaꞌ. 9 Teing biiꞌka minkuarimaung kapooꞌnanka tavoꞌaruꞌning ooaama diiꞌ beeroꞌdarampiko. Eeꞌ minkuraarimaung: Diiꞌke siperereruꞌ teing diikaning ovontung tositosinanka; 10 eeꞌnoko bereꞌdariruꞌ tee Kumponing masikung-anko, tee-koo daiꞌdariri siomperiiꞌnaang, tee eeꞌnara domaang okovenung; eeꞌnoko enang neng-antararimaung tee Kumponing Bauring paning-eta toroaravainooꞌkoo. Tee eeꞌnara booꞌketa daaꞌantavuuꞌnung, Jiisuuꞌ, niiꞌ domang-anta tee-koo Kumponing bakaang iira damaꞌ tavoꞌaravaing-koo.